Як паведамляюць дэпутаты, нормы закону будуць распаўсюджвацца на грамадзян Украіны, а таксама асобаў украінскага паходжаньня з тых краін, якія прызналі Расею краінай-агрэсаркай і ўвялі супраць яе санкцыі.
Праект закону вызначае выпадкі, пры якіх дазволяць падвойнае грамадзянства. У прыватнасьці, гаворыцца аб дзецях з украінскім грамадзянствам паводле нараджэньня і грамадзянствам іншай краіны, дзецях — грамадзянах Украіны, якія маюць яшчэ грамадзянства сваіх усынаўляльнікаў, а таксама грамадзянах Украіны, якія аўтаматычна атрымліваюць іншае грамадзянства ў выніку шлюбу.
Падвойнае грамадзянства дазволена асобам украінскага паходжаньня, якія маюць замежнае грамадзянства (напрыклад прадстаўнікам замежнай украінскай дыяспары).
У той жа час законапраект прадугледжвае, што ўрад краіны распрацуе пералік дзяржаваў, грамадзяне якіх могуць прэтэндаваць на атрыманьне ўкраінскага пашпарту ў спрошчаным парадку.
Ірына Герашчанка, дэпутатка Вярхоўнай рады Ўкраіны, фракцыя «Эўрапейская салідарнасьць»
Як адзначыла дэпутатка Вярхоўнай рады Ірына Герашчанка, ухвалены праект ініцыяваў Уладзімір Зяленскі, а пры яго рыхтаваньні ўнесьлі шмат зьменаў, у тым ліку абавязковы іспыт на веданьне Канстытуцыі Ўкраіны, гісторыі і ўкраінскай мовы.
«Разам з тым, у законапраекце няма наўпрост забароны на спрошчанае атрыманьне ўкраінскага грамадзянства для грамадзян Расеі. Крытэрыі краін, грамадзяне якіх маюць права на атрыманьне ўкраінскага грамадзянства, будзе вызначаць Кабінэт міністраў», — паведаміла Ірына Герашчанка.
У той жа час, паводле яе, законапраект «пашырае магчымасьці для атрыманьня грамадзянства Ўкраіны некаторымі катэгорыямі замежнікаў і асобаў без грамадзянства, якія праходзяць вайсковую службу на падставе кантрактаў з Узброенымі сіламі, Нацыянальнай гвардыяй і іншымі вайсковымі структурамі Ўкраіны».
Грамадзяне Беларусі, як вынікае з паведамленьняў дэпутатаў, асобна ня згадваюцца.
ГЛЯДЗІЦЕ ТАКСАМА: Ці ёсьць негалоснае распараджэньне не даваць замежнікам украінскае грамадзянства? Меркаваньні беларусаў УкраіныЯкія абмежаваньні вызначылі для іншаземцаў
Законапраект прадугледжвае, што падвойнае грамадзянства ў выпадках афармленьня грамадзянства Ўкраіны не дазваляецца асобам, якія маюць грамадзянства дзяржавы, якую Вярхоўная Рада прызнала агрэсаркай, або дзяржавы, якая не прызнае тэрытарыяльную цэласнасьць і сувэрэнітэт Украіны, або адмаўляецца прызнаваць супрацьпраўнасьць замахаў на тэрытарыяльную цэласнасьць, у тым ліку галасавала супраць адпаведных рэзалюцый ААН. Беларусь адпавядае апошнім двум крытэрам.
Але праект закону дапускае зварот па ўкраінскае грамадзянства паводле спрошчанай працэдуры замежнікам, якія на падставе кантракту служаць у войску, Нацыянальнай гвардыі і Дзяржаўнай спэцыяльнай службе транспарту або маюць дзяржаўныя ўзнагароды. Аднак яны павінны падаць дэклярацыю аб адмове ад замежнага грамадзянства і прызнаньні сябе толькі грамадзянінам Украіны.
Згодна з дакумэнтам, у грамадзянства Ўкраіны не прымаюць асобаў, асуджаных ва Ўкраіне і іншых дзяржавах за цяжкія і асабліва цяжкія злачынствы з улікам узроўню пагрозы для нацыянальнай бясьпекі Ўкраіны, а таксама асобаў, якія нясуць пагрозу нацыянальным інтарэсам, нацыянальнай бясьпецы, грамадзкаму парадку, сувэрэнітэту і тэрытарыяльнай цэласнасьці Ўкраіны.
Цяперашні закон ухвалены як адказ на дэмаграфічныя выклікі ў сфэры бясьпекі, а таксама на неабходнасьць аднаўленьня і захаваньня сувязяў з замежнымі ўкраінцамі.
Цяпер ва Ўкраіне няма адказнасьці за другое грамадзянства, але дзяржаўным службоўцам забаронена мець грамадзянства іншай краіны. Звычайныя ўкраінцы могуць не дэкляраваць наяўнасьць другога грамадзянства.
ГЛЯДЗІЦЕ ТАКСАМА: Выпрабаваньне на ўкраінскі патрыятызм. Украінскія байцы з Расеі і Беларусі гадамі ня могуць атрымаць новыя пашпарты ва Ўкраіне