Урад Літвы зможа ўводзіць два тыпы санкцыяў: замарожваньне актываў і сэктаральныя (эканамічныя) абмежаваньні, гаворыцца на сайце парлямэнту.
Сьпіс фізычных і юрыдычных асобаў, якія трапяць пад санкцыі, будзе вызначаць Кабінэт міністраў.
Санкцыі закрануць экспарт тавараў, тэхналёгіі, паслуг і праграмнага забесьпячэньня, якія могуць выкарыстоўвацца для разьвіцьця вайсковага, абароннага ці прамысловага патэнцыялу Расеі і Беларусі.
ГЛЯДЗІЦЕ ТАКСАМА: Кіраўнік кампаніі «Белавія» расказаў пра санкцыі, прыбыткі, палёты ў небясьпечную зону і новыя самалётыПад санкцыі могуць трапіць асобы, якія
- падтрымліваюць вайну РФ супраць Украіны,
- падтрымліваюць дзеньні, якія пагражаюць бясьпецы Ўкраіны,
- проста або ўскосна шкодзяць бяспецы Літвы праз гібрыдную дзейнасьць,
- падтрымліваюць парушэньне правоў чалавека і рэпрэсіі ў Беларусі і Расеі або вядуць дзейнасьць, якая пагражае дэмакратыі,
- зьвязаныя з падсанкцыйнымі асобамі.
Праект паправак падтрымалі 102 дэпутаты, супраць прагаласаваў 1, яшчэ 1 устрымаўся.
Кансэрватары хочуць забараніць беларусам набываць нерухомасьць каля важных аб’ектаў
Пры гэтым камітэт замежных справаў не падтрымаў прапанову кансэрватараў аб забароне расейцам купляць нерухомасьць побач з важнымі абʼектамі або вайсковымі палігонамі. Гэтае рашэньне не зьмянілася і падчас галасаваньня ў парлямэнце, дзе дэпутаты адхілілі ініцыятыву кансэрватара Міндаўгаса Лінге.
Аднак камітэт вырашыў накіраваць гэтую прапанову ва ўрад. Пры гэтым, улічыўшы заўвагу кансэрватара Аўдронюса Ажубаліса, ураду прапануюць увесьці абмежаваньні на куплю нерухомасьці ня толькі для грамадзян Расеі, але і для грамадзян Беларусі, паведаміла LRT.
ГЛЯДЗІЦЕ ТАКСАМА: Дасьледнікі расказалі, праз што ў Беларусь прасоўваецца «русский мир» і як гэтаму процідзейнічаць«Мы тут ня першыя. Нашыя суседзі, дзяржавы рэгіёну, маюць значна большы досьвед нацыянальных санкцыяў. Мы, у пэўнай ступені, сочым за гэтым працэсам. Дзяржавы, што не ўваходзяць у Эўрапейскі Зьвяз, усе яны маюць мэханізмы санкцыяў. [...] Адной з прычын, чаму ў нас не было распрацаванага мэханізму нацыянальных санкцыяў, было тое, што мы больш, чым іншыя дзяржавы, абапіраліся на агульную замежную і бясьпекавую палітыку Эўразьвязу», — казаў міністар замежных справаў Літвы Кястуціс Будрыс, прэзэнтуючы праект закону ў парлямэнце.
Літва ўжо мае абмежаваньні для грамадзян Расеі і Беларусі. Іх уезд у краіну і выдача ім дазволаў на жыхарства ў Літве абмежаваныя, іх правяраюць на наяўнасьць пагрозаў нацыянальнай бясьпецы, ім забаронены ўвоз або вываз украінскіх грыўняў, а таксама забаронены ўвоз сельскагаспадарчай прадукцыі і кармоў з Расеі або Беларусі.
Расейцам, якія ня маюць дазволу на жыхарства ў Літве, забаронена купляць нерухомасьць у краіне.
ГЛЯДЗІЦЕ ТАКСАМА: Латвія забараніла набываць нерухомасьць грамадзянам Беларусі і РасеіШто варта ведаць пра цяперашнія санкцыі супраць Беларусі
2020 год
Краіны Эўразьвязу, ЗША, Канада, Вялікая Брытанія і Японія пачалі ўводзіць санкцыі супраць Беларусі пасьля жорсткіх разгонаў акцый пратэсту супраць фальсыфікацыі вынікаў прэзыдэнцкіх выбараў у 2020 годзе. Да гэтых і наступных санкцый далучаліся таксама іншыя краіны, у тым ліку партнэры ЭЗ.
Першапачаткова гэта былі пераважна візавыя абмежаваньні і замарожваньне актываў для чыноўнікаў рэжыму Аляксандра Лукашэнкі і для іншых асобаў, падазраваных ва ўдзеле ў рэпрэсіях і фальсыфікацыях выбараў.
2021 год
Эўразьвяз увёў эканамічныя сэктаральныя санкцыі пасьля інцыдэнту з прымусовай пасадкай самалёта Ryanair у Менску 23 траўня 2021 году і наступнага затрыманьня журналіста Рамана Пратасевіча і ягонай партнэркі Соф’і Сапегі, а таксама з прычыны парушэньняў правоў чалавека і рэпрэсій.
Сярод іншага, Эўразьвяз тады ўвёў абмежаваньні на імпарт беларускіх калійных угнаеньняў і забараніў палёты ў паветранай прасторы ЭЗ а таксама доступ да аэрапортаў ЭЗ усім беларускіх авіякампаніям. Эўрапейскім авіякампаніям таксама забаранілі авіяперавозкі празь Беларусь.
Злучаныя Штаты, Вялікая Брытанія і шэраг іншых краінаў таксама ўвялі падобныя эканамічныя санкцыі пасьля інцыдэнту з самалётам Ryanair.
У сьнежні 2021 году Эўразьвяз увёў пакет санкцыяў у сувязі зь міграцыйным крызісам, абвінаваціўшы афіцыйны Менск і Маскву ў «гібрыднай агрэсіі» супраць ЭЗ і выкарыстаньні нелегальнай міграцыі як зброі. Новыя санкцыі ЭЗ тычыліся 17 фізычных і 11 юрыдычных асобаў, чые актывы замарожваліся. Падобныя ж санкцыі тады ўвялі ЗША, Канада і Вялікая Брытанія.
2022-2025 год
У лютым 2022 году расейскія войскі скарысталі тэрыторыю Беларусі для ўварваньня ва Ўкраіну, а ў першыя месяцы поўнамаштабнай вайны яны выкарыстоўвалі беларускую тэрыторыю для абстрэлу Ўкраіны.
У сувязі з гэтым у лютым 2022 году пра новыя санкцыі супраць Расеі і Беларусі абвясьцілі ЗША, Канада і Эўразьвяз. Гэтыя санкцыі тычыліся шэрагу беларускіх чыноўнікаў, вайскоўцаў, а таксама прадпрыемстваў. Цягам наступных месяцаў, свае аналягічныя санкцыі ўводзілі Карэя, Японія і шэраг іншых краінаў.
Ад 2022 году ў сувязі з удзелам рэжыму Лукашэнкі ў расейскай агрэсіі супраць Ўкраіны Эўразьвяз зрабіў яшчэ больш за дзясятак санкцыйных крокаў адносна Беларусі. Мноства санкцый увялі таксама ЗША ды іншыя краіны. Сярод крокаў Эўразьвязу былі наступныя:
- 9 сакавіка 2022 году Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.
- 3 чэрвеня 2022 году ў санкцыйны сьпіс Эўразьвязу былі ўключаныя: кіраўнік ЦВК Ігар Карпенка, сыны бізнэсоўца Аляксея Алексіна Дзьмітрый і Віталь, сэрбскі бізнэсовец Багалюб Карыч, які меў інтарэсы ў Беларусі, пракурор Дзяніс Мікушаў, судзьдзя Мікалай Доля, былы кіраўнік ГУБАЗіКу Андрэй Паршын, генэральны дырэктар «Беларуськалію» Іван Галаваты, а таксама прапагандысты Ігар Тур, Андрэй Сыч, Людміла Гладкая і Рыгор Азаронак. Таксама ЭЗ ухваліў адключэньне ад SWIFT «Белінвестбанку» і ўвёў новыя санкцыі супраць Беларуськалію, Беларускай калійнай кампаніі, «Інтэр-Табака», «Нафтана», Гродзенскай тытунёвай фабрыкі «Нёман», Белмытсэрвісу, Белкамунмаша і Белтэлерадыёкампаніі.
- 3 жніўня 2023 году ЭЗ дадаў у санкцыйныя сьпісы яшчэ 38 асобаў — пераважна судзьдзяў і начальнікаў калёніяў, а таксама прапагандыстаў Вадзіма Гігіна і Ксенію Лебедзеву. Пад санкцыі трапілі і тры прадпрыемствы — Белнафтахім, ААТ «Менскі электратэхнічны завод» і ААТ «БМЗ — кіроўная кампанія холдынгу „БМК“»
- 29 чэрвеня 2024 году Эўразьвяз распаўсюдзіў на Беларусь санкцыі, якія да таго ўвёў супраць Расеі. У прыватнасьці ЭЗ абмежаваў пастаўкі шэрагу відаў прадукцыі і тэхналёгій падвойнага прызначэньня, якія маглі перадавацца ў Расею празь Беларусь. Гэта тычылася тавараў і тэхналёгій, зьвязаных са сфэрай абароны і бясьпекі, а таксама агнястрэльнай зброі і яе кампанэнтаў. Таксама ўвялі забарону на імпарт зь Беларусі золата, алмазаў, гелію, вугалю, сырой нафты, каб Беларусь не рабіла рээкспарту з Расеі забароненых тавараў.
- 24 лютага 2025 году ў 16-ы пакет санкцыяў Эўразьвязу было ўключанае беларускае прадпрыемства «Інтэграл» — вытворца паўправаднікоў, інтэгральных схемаў і іншай высокатэхналягічнай прадукцыі.
- 27 сакавіка 2025 Эўразьвяз увёў санкцыі яшчэ супраць 25 фізычных і 7 юрыдычных асоб Беларусі. У санкцыйны сьпіс, у прыватнасьці, трапілі Цэнтральная выбарчая камісія Беларусі, РУП «Беларускія лятарэі», ТАА «Рыдота», ААТ «Плянар», РВУП «Завод дакладнай электрамэханікі», а таксама ТАА «Цыбулька-Бел» з аграгарадку Гуды Лідзкага раёну (Горадзенская вобласьць). Уладальнікам «Цыбулькі-Бел» зьяўляецца дэпутат фэдэральнай зямлі Саксонія ад ультраправай партыі «Альтэрнатыва для Нямеччыны» Ёрг Дорнаў, якога падазраюць у выкарыстаньні працы беларускіх палітвязьняў. Сярод асобаў пад санкцыямі апынуліся кіраўнікі вышэйназваных прадпрыемстваў, судзьдзі, чальцы ЦВК і партыі «Белая Русь».